ដោយ បូ សាវី និង អ៊ឹង ប៊ុនថន ថ្ងៃសុក្រ ទី04 ឧសភា ឆ្នាំ2012 ម៉ោង09:27
ប្រជាពលរដ្ឋជាច្រើនគ្រួសារ នៅក្នុងឃុំឃុនរាម ស្រុកបន្ទាយស្រី ខេត្តសៀមរាប ចោទមន្រ្តីរដ្ឋបាលព្រៃឈើខេត្តនេះថា បានឈូសឆាយរំលោភយកដីចំការនិងដីស្រែពួកគេ ជាច្រើនហិកតា កាលពីថ្ងៃទី៣ ខែឧសភានេះ។
អ្នកស្រី សុវណ្ណ សុម៉ាលី ប្រាប់សំឡេងប្រជាធិបតេយ្យ VOD តាមទូរស័ព្ទថា ដីចំការរបស់គាត់ទំហំ ៧៦ហិកតា និង៧៥អា ដែលបានទិញពីពលរដ្ឋផ្សេងទៀត តាំងពីឆ្នាំ២០០៧ និងបានដាំដើមស្វាយចន្ទីចំនួន១២០០ដើម និងដំណាំស្រូវមួយចំនួនទៀត ជារៀងរាល់ឆ្នាំនោះ ត្រូវរដ្ឋបាលព្រៃឈើ ឈូសឆាយរំលោភយកអស់ប្រហែលចំនួន១៥ហិកតា។ អ្នកស្រីបន្ដទាំងអួលដើមកថា ដីនៅកន្លែងនោះត្រូវមន្រ្តីរដ្ឋបាលព្រៃឈើ ទន្ទ្រានយកទៅដាំកូនឈើ ដោយមិនផ្តល់សំណងដល់គាត់ឡើយ ៖ "ឥឡូវនេះស្នាមមេដៃប្រជាជនដែលរងផលប៉ះពាល់ពីភូមិខាងលិចមកផង ពីខាងជើងមកផង ដែលព្រឹកមិញនាំគ្នាទៅអង្គការលីកាដូ ជួយរកយុត្តិធម៌ហ្នឹងគឺចំនួន៩៧គ្រួសាររួមទាំងខ្ញុំផង ហើយគេបង្ខំប្រជាជនខ្លះ ដែលមិនទាន់ដល់ដកដំឡូង បង្ខំអោយដកអោយហើយ ប្រញ៉ាប់រួសរ៉ាន់អោយបានលឿនទៀតផង។ លោកសួរភ្លាមៗចាំអត់កើតម៉ងវាហួសនិស្ស័យ"។
លោក វង្ស កុង ជាប្រជាពលរដ្ឋម្នាក់ទៀត អោយដឹងថា ដីគាត់ចំនួន៧ហិកតា ដែលបានកាន់កាប់តាំងពីឆ្នាំ១៩៨០នោះ ត្រូវបានរដ្ឋាភិបាលដាក់ចូលជាដីសម្បទានសង្គមកិច្ច។ ប៉ុន្តែលោកថា មន្រ្តីរដ្ឋបាលព្រៃឈើ បានបញ្ជាឲ្យគេ ឈូសឆាយចូលដីស្រែគាត់នេះ ដោយមិនបានប្រាប់ពួកគាត់ទេ ហើយអាជ្ញាធរ បានប្រមូលយកឈ្មោះម្ចាស់ដីស្រែនិងចំការ ដើម្បីពិនិត្យមើល ប៉ុន្ដែមិនបានប្រគល់លិខិតកាន់កាប់ដីនោះ មកឲ្យពលរដ្ឋវិញទេ។
ក៏ប៉ុន្តែ នាយរងសង្កាត់រដ្ឋបាលព្រៃឈើកន្ទួតខ្នារក្រៅ លោក សេង លន មានប្រសាសន៏ថា ដីនោះ គឺជាដីដែលរាជរដ្ឋាភិបាលកម្ពុជា ទុកដាំកូនឈើក្រញូងចំនួន៤២៨ហិកតា សម្រាប់ជាប្រវត្ដិសាស្រ្ដនៅកម្ពុជា។ លោកបន្ដថា អាជ្ញាធរបានចេញសេចក្ដីជូនដំណឹងដល់ម្ចាស់ដីជាច្រើនលើកមកហើយ ដោយមិនឲ្យមានការទិញ-លក់ដីនៅតំបន់នោះ តាំងពីមុនឆ្នាំ២០០៧ ៖ "គាត់ទៅលួចកាប់ដីព្រៃឈើ របស់រដ្ឋបាលព្រៃឈើរបស់រាជរដ្ឋាភិបាល តាំងទីលំនៅដោយខុសច្បាប់ ហើយការបង្ក្រាបរបស់ខ្ញុំជូនដំណឹង ច្រើនដងហើយ រហូតចាប់មេខ្លោងវាដាក់គុកទៀតផង”។
ដោយឡែក អភិបាលស្រុកបន្ទាយស្រី លោក ម៉ឹង វុទ្ធី លោកអះអាងថា បញ្ហានេះ បានដោះស្រាយរួចរាល់ ជាមួយពលរដ្ឋហើយ ៖ "យើងអត់ដឹងផង ដូចជាដោះស្រាយអស់ហើយអត់មានអីផង”។
ទោះយ៉ាងណា អ្នកសម្របសម្រួល អង្គការលីកាដូ ប្រចាំខេត្តសៀមរាប លោក នូវ ពុទ្ធិ មានប្រសាសន៍ថា បើតាមសេចក្ដីជូនដំណឹង លេខ១៤៧ ចុះថ្ងៃទី២៤ ខែមេសា ឆ្នាំ២០១២នេះ បានអោយដឹងថា ប្រធានរដ្ឋបាលព្រៃឈើស្នើសុំអោយប្រជាជន ប្រមូលផលដំណាំរបស់ខ្លួនអោយរួចក្នុងរយៈពេល ១៥ថ្ងៃ ដើម្បីរដ្ឋបាលព្រៃឈើធ្វើថ្នាលដាំកូនឈើរុក្ខទិវានៅថ្ងៃទី៩ ខែកក្កដា ខាងមុខនេះ។ លោកបន្ដថា ក្នុងនាមសង្គមស៊ីវិល លោកបានស្នើអោយអាជ្ញាធរសម្របសម្រួលជាមួយនឹងប្រជាពលរដ្ឋ ព្រោះកន្លងមកមានរដ្ឋអំណាចមូលដ្ឋាន បានបង្ហាញថា ដីតំបន់នោះមិនមានបញ្ហា ទើបពួកគេហ៊ានទិញដីនោះធ្វើស្រែចំការបែបនេះ៕
No comments:
Post a Comment