(ថ្ងៃទី 18 ឧសភា 2012, ម៉ោង 04:07:PM) | ដោយ: បាយ័ន
នៅព្រលប់ថ្ងៃទី១៧ ខែឧសភា រថយន្តប្រភេទយីឌុបពីរគ្រឿង របស់ឈ្មោះ សុខ សំណាង ត្រូវបានគេប្រទះឃើញដឹកឈើឆ្លងកាត់ស្រុកស្វាយលើ តាមដងផ្លូវជាតិលេខ៦២ តែពុំមានការត្រួតពិនិត្យឲ្យបានជាក់លាក់ពីមេព្រៃ ដែលមានស្នាក់ការតាមដងផ្លូវទេ គឺគ្រាន់តែអះអាងថាមានច្បាប់។
លោក ចាន់ វ៉ាន់សុង នាយកតំបន់អង្គការការពារ អភិរក្សសត្វ ព្រៃឈើ និងជលផលកម្ពុជា បាននិយាយថា កាលពីព្រលប់ថ្ងៃទី១៧ឧសភា លោកពុំបានឃាត់រថយន្តដឹកឈើរបស់ឈ្មោះ សុខ សំណាង មើលច្បាប់ទេ ដោយសាតែលោកនៅឆ្ងាយ។ តែកន្លងមកលោកធ្លាប់ឃាត់ពិនិត្យមើល ឃើញច្បាប់នោះចេញដោយលោក នូភិរម្យ នាយផ្នែករដ្ឋបាលព្រៃឈើអន្លង់វែង ដោយច្បាប់នោះពុំបានបញ្ជាក់ថា អនុញ្ញាតឲ្យក្រុមហ៊ុនមួយណា ឈ្មោះអ្វី ជាអ្នកដឹកជញ្ជូនឈើទេ តែឃើញសរសេរថា អនុញ្ញាតឲ្យឈ្មោះ សុខ សំណាង ដឹកជញ្ជូនឈើតែម្តង។
លោក ចាន់ វ៉ាន់សុង បន្ថែមថា តាមការពិនិត្យកន្លងមក ក្នុងច្បាប់ដឹកជញ្ជូនឈើនីមួយៗ ដែលចេញដោយលោក នូ ភិរម្យ គឺសុទ្ធតែត្រូវបានបញ្ជាក់អំពីឈ្មោះក្រុមហ៊ុនយ៉ាងជាក់លាក់ ហើយច្បាប់ក្នុងមួយឡានអនុញ្ញាតឲ្យត្រឹមតែ ២៧ ទៅ ២៨ ម៉ែត្រគូបប៉ុណ្ណោះ។ តែក្នុងមួយរយៈនេះ លោក នូ ភិរម្យ អនុញាតឲ្យមួយឡាន មានរហូតជាង ៤០ ម៉ែត្រគូប ហើយមិនចាំបាច់ក្រុមហ៊ុនទេ គឺចេញច្បាប់ឲ្យឈ្មួញដឹកឆៅៗតែម្តង។
ទាក់ទិននឹងករណីនេះ នាយផ្នែករដ្ឋបាលព្រៃឈើអន្លង់វែង លោក នូ ភិរម្យ នៅព្រឹកថ្ងៃទី១៨ឧសភា បានប្រាប់ CEN តាមទូរស័ព្ទថា "លោក សុខ សំណាង គឺជាក្រុមហ៊ុនឈ្មោះ សុខ សំណាង"។ ពេលសួរថា ក្នុងលិខិតដឹកឈើមិនឃើញមានឈ្មោះក្រុមហ៊ុន លោក នូ ភិរម្យ ឆ្លើយថា "មិនបានបញ្ជាក់"។
លោកនាយផ្នែកនិយាយទៀតថា តាមពិតរឿងនេះ ក្រុមហ៊ុនឈ្មោះទំរីងរ៉ាប់ប័រ ជាអ្នកទទួលបានសិទ្ធិវិនិយោគដីសម្បទានសេដ្ឋកិច្ច ក៏ប៉ុន្តែដោយក្រុមហ៊ុននោះឈប់ដឹកឈើដោយខ្លួនឯង ក៏ផ្តល់សិទ្ធិឲ្យទៅឈ្មោះ សុខ សំណាង ជាអ្នកដឹកជញ្ជូនឈើវិញ ហើយក្រុមហ៊ុននេះមានទីតាំងក្នុងទឹកដីខេត្តឧត្តរមានជ័យ ម្តុំព្រៃស្អាក។
ទោះបីលោក នូ ភិរម្យ អះអាងយ៉ាងនេះក៏ដោយ តែប្រភពមួយបានបង្ហើបថា កាលពីដើមឡើយ ក្រុមហ៊ុនទំរីងរ៉ាប់ប័រ ជាអ្នកដឹកជញ្ជូនឈើ។ លុះពេលឈើនៅក្នុងក្រុមហ៊ុនរេចរឹលអស់ ហើយពុំមានឈើដឹកបន្តទៀត ក៏ផ្ទេរទៅឲ្យឈ្មោះ សុខ សំណាង ជាអ្នកដឹកម្តងវិញ។ ប្រភពបន្តថា ការដែលក្រុមហ៊ុនបញ្ឈប់ការដឹកឈើខ្លួនឯង ព្រោះមិនអាចទៅទិញឈើពីខាងក្រៅបាន ម្យ៉ាងទៀតការទិញឈើពីខាងក្រៅ វាប៉ះពាល់ដល់ឈ្មោះក្រុមហ៊ុន។
ប្រភពដដែលបញ្ជាក់ទៀតថា ចំពោះឈ្មោះ សុខ សំណាង នេះ ក្រោយពេលយកឈ្មោះក្រុមហ៊ុនទំរីងរ៉ាប់ប័រ មកប្រើហើយ ក៏ដើរទិញឈើពីខាងក្រៅ (ឈើកាប់ដោយអនាធិបតេយ្យ) ចូលមកក្នុងក្រុមហ៊ុន ហើយដឹកចេញបន្ត។ ដូច្នេះហើយទើបនៅក្នុងលិខិតអនុញាត លោកមេព្រៃមិនហ៊ានបញ្ជាក់អំពីឈ្មោះក្រុមហ៊ុនពិតប្រាកដ ដោយអនុញាតឲ្យឈ្មោះ សុខ សំណាង ដឹកពេញមុខតែម្តង៕ K
No comments:
Post a Comment