Thursday, May 17, 2012
លោកខៀវ សុភ័គ៖ មិនមានរបាយការណ៍ទាក់ទងនឹងលោកម៉ម សូណង់ដូនោះទេ
សមត្ថកិច្ច បានប្រកាសស្វែងរកចាប់ខ្លួនមនុស្ស៥នាក់ដែលសមត្ថកិច្ចអះអាងថាជា មេខ្លោងដឹកនាំប្រជាជនចាប់យកដីរដ្ឋដោយខុសច្បាប់នៅក្នុងឃុំកំពង់ ដំរី ស្រុកឆ្លូង ខេត្តក្រចេះ។ ក្នុងចំណោមបុរសទាំង៥នាក់នោះ មានឈ្មោះប៊ុន រដ្ឋា ដែលជាសមាជិកសមាគមអ្នកប្រជាធិបតេយ្យរបស់លោកម៉ម សូណង់ដូ។ អ្នកនាំពាក្យក្រសួងមហាផ្ទៃថ្លែងថា «វាអាស្រ័យលើសំណុំរឿង»។
ប៊ុន រដ្ឋា ដែលសមត្ថកិច្ចចាត់ទុកថា ជាមេខ្លោងដើរតួជំនួសអាជ្ញាធរវាស់វែងចែកដីធ្លីអោយពលរដ្ឋនៅក្នុង ឃុំកំពង់ដំរីស្រុកឆ្លូងខេត្តក្រចេះនោះ គឺជាតំណាងសមាគមអ្នកប្រជាធិបតេយ្យរបស់លោកម៉ម សូណង់ដូ ដែលជាប្រធានវិទ្យុសំបុកឃ្មុំ។ សេចក្តីថ្លែងការណ៍របស់ក្រសួងមហាផ្ទៃនារសៀលថ្ងៃពុធនេះ មិនបាននិយាយអំពីមុខងាររបស់លោកប៊ុន រដ្ឋានៅក្នុងសមាគមអ្នកប្រជាធិបតេយ្យនោះឡើយ។
លោកឧត្តមសេនីយឯក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់គេហទំព័រ «ថ្មី» នៅល្ងាចថ្ងៃពុធនេះថា វាមិនមានឯកសារដែលបង្ហាញពីការពាក់ព័ន្ធប៊ុន រដ្ឋានៅក្នុងសំណុំរឿងកាន់ដីធ្លីនេះ ជាមួយលោកម៉ម សូណង់ដូនោះទេ។ «វាអាស្រ័យលើសំណុំរឿង។ វាស្ថិតនៅលើតុលាការតទៀតដែលធ្វើការលើបញ្ហានេះ» នេះជាការបញ្ជាក់របស់លោកឧត្តមសេនីយខៀវ សុភ័គ។
មិនទាន់មានការអត្ថាធិប្បាយអ្វីនៅឡើយដែរពីលោកម៉ម សូណង់ដូ។ បុគ្គលិកវិទ្យុសំបុកឃ្មុំបាននិយាយអោយដឹងថា លោកម៉ម សូណង់ដូកំពុងនៅសហរដ្ឋអាមេរិក៕
Subscribe to:
Post Comments (Atom)
No comments:
Post a Comment