ពលរដ្ឋ និងសកម្មជនប្រមាណជា៦០០នាក់
មកពីសហគមន៍ផ្សេងៗគ្នាទូទាំងប្រទេស នៅព្រឹកថ្ងៃសុក្រទី ០៧ ខែមិថុនា ឆ្នាំ២០១៣ នេះ
ជួបជុំគ្នានៅខាងមុខរដ្ឋសភា ដើម្បីដាក់ញត្តិជំរុញឲ្យស្ថាប័នមួយនេះជួយអន្តរាគមន៍ទៅក្រសួងកសិកម្ម
ទម្លាក់ចោលចំណុចមួយចំនួន ក្នុងសេចក្តីព្រាងច្បាប់ ស្តីពីការគ្រប់គ្រង
និងប្រើប្រាស់ដីកសិកម្ម។
ក្រុមអ្នកតវ៉ាទៅដាក់ញត្តិនៅរដ្ឋសភានេះ
គឺធ្វើឡើងបន្ទាប់ពីពួកគេបានដាក់ញត្តិទៅក្រសួងកសិកម្ម
ដោយមានមន្ត្រីក្រសួងចេញមកទទួលពីតំណាងកសិករដែលមកទាំង២៤ ខេត្ត/រាជធានី ។
ពួកគេលើកឡើងថា
សេចក្តីព្រាងច្បាប់ស្តីពីការគ្រប់គ្រង និងប្រើប្រាស់ដីកសិកម្ម នឹងរឹតត្បិតចំពោះពួកគេ។
អ្នកយកព័ត៌មានរបស់VOD អ្នកនាងថុល ស្រីលក្ខណ៍ ដែលបានតាមដានការតវ៉ានេះ
ឲ្យដឹងថា រហូតមកដល់ពេលនេះ តំណាងអ្នកតវ៉ាបីនាក់
ត្រូវបានអនុញ្ញាតឲ្យចូលក្នុងរដ្ឋសភា ដើម្បីដាក់ញត្តិ។
ការតវ៉ានេះ
ត្រូវបានធ្វើឡើងបន្ទាប់ពួកគេ បានបើកសិក្ខាសាលាពិគ្រោះយោបល់ថា្នក់ជាតិ
របស់សមាគមបណ្តាញសហគមន៍កសិករ ស្តីពី កសិករនៅតាមមូលដ្ឋាន
ប្រឈមមុខបាត់បង់សិទ្ធប្រើប្រាស់ដីរបស់ខ្លួន កាលពីថ្ងៃទី០៦ ខែមិថុនា
ឆ្នាំ២០១៣។
សេចក្តីព្រាងច្បាប់ស្តីពីការគ្រប់គ្រង
និងប្រើប្រាស់ដីកសិកម្មនេះ មាន១១ជំពូក និង៦២មាត្រា។
អង្គការសង្គមស៊ីវិល លើកឡើងថា ប្រសិនបើសេចក្តីព្រាងច្បាប់នេះ
ត្រូវបានអនុម័ត លទ្ធផលនឹងធ្វើឲ្យប៉ះពាល់ប្រជាកសិករចំនួន ៨០ភាគរយ។
សេចក្ដីព្រាងច្បាប់លើកទី១ នឹងគ្រោងប្រកាសដាក់ឲ្យប្រើប្រាស់ក្នុងឆ្នាំ២០១៤
ដែលបានចែងពីទោសបញ្ញត្តិដល់កម្មសិទ្ធិ
ឬអ្នកកាន់កាប់ដីធ្លីសម្រាប់ការល្មើស
ឬខកខានក្នុងការអនុវត្តតាមបញ្ញត្តិនៃច្បាប់នេះ
នឹងត្រូវប្រឈមជាប់ពន្ធនាគារពី១ខែទៅ១ឆ្នាំ និងពិន័យជាប្រាក់ចាប់ពី១លាន
ដល់៥លានរៀល។
កាលពីថ្ងៃទី២៩
ខែសីហា ឆ្នាំ២០១២ នៅក្នុងសន្និសីទសារព័ត៌មានមួយ ក្រុមបណ្ដាញសហគមន៍កសិករ
ដែលបណ្ដុំទៅដោយសមាគមចំនួន១៥ ធ្វើការលើវិស័យកសិកម្ម បានប្រតិកម្ម
ទៅនឹងសេចក្ដីព្រាងច្បាប់ ស្តីពីការគ្រប់គ្រង និងប្រើប្រាស់ដីកសិកម្ម៕
No comments:
Post a Comment