ថ្ងៃសុក្រ ទី04 ឧសភា ឆ្នាំ2012 ម៉ោង17:08
អតីតអ្នកបុរីកីឡាជាង១០០គ្រួសារ ក្នុងខណ្ឌ៧មករា រាជធានីភ្នំពេញ ដាក់ពាក្យបណ្តឹងទៅតំណាងពិសេសរបស់អង្គការសហប្រជាជាតិ ឲ្យជួយរកយុត្តិធម៌ឲ្យពួកគេ។
នៅក្នុងលិខិតសុំអន្តរាគមន៍ចុះថ្ងៃទី៣ខែឧសភានេះ អ្នកភូមិដែលត្រូវបានបណ្តេញចេញដោយហិង្សា កាលពីដើមឆ្នាំ២០១២នេះ បានអះអាងថាពួកគេជាជនរងគ្រោះដោយសារក្រុមហ៊ុនផានអ៊ីម៉ិចឈូសឆាយកំទេចលំនៅឋាន ដោយមិនទទួលបានសំណងសមរម្យ។
ការសុំអន្តរាគមន៍កើតឡើង ខណៈលោក ស៊ូយ៉ា ស៊ូប៊ែឌី មកបំពេញបេសកកម្មនៅកម្ពុជា ចាប់ ពីថ្ងៃ ទី៤ដល់ថ្ងៃទី១១ខែឧសភានេះ ដោយផ្តោតសំខាន់លើដីសម្បទានសង្គមកិច្ច ដែលលោករកឃើញថា មានផលប៉ះពាល់ដល់សិទ្ធិរស់នៅរបស់សហគមន៍មូលដ្ឋាន។
អ្នកស្រី ស ស៊ន អះអាងជាតំណាងប្រជាពលរដ្ឋមានប្រសាសន៍ថា ពួកគាត់បានដាក់ពាក្យបណ្តឹងទៅលោក ស៊ូយ៉ា កាលពីថ្ងៃព្រហស្បតិ៍ម្សិលមិញនេះ។ អ្នកស្រីបន្តថា ពួកគាត់សង្ឃឹមថា តំណាងពិសេសរបស់អង្គការសហប្រជាជាតិរូបនេះ នឹងអាចជួយដោះស្រាយបញ្ហាដីធ្លីឲ្យពួកគាត់បាន។
នៅក្នុងពាក្យបណ្តឹងរបស់អ្នកបុរីកីឡា ដែលមានស្នាមមេដៃ តំណាងប្រជាពលរដ្ឋចំនួន៩នាក់ បានឲ្យដឹងថា កាលពីឆ្នាំ២០០៣ រាជរដ្ឋាភិបាលកម្ពុជាបានប្រគល់ដីសម្បទានសេដ្ឋកិច្ចទំហំជាង៤ហិកតា ឲ្យប្រជាពលរដ្ឋ១០សហគមន៍ ស្មើចំនួន ១៧៧៦គ្រួសារ ។តែក្នុងលិខិតនោះ បានតម្រូវឲ្យក្រុមហ៊ុនផានអ៊ីម៉ិចសាងសង់អគារចំនួន១០ មាន១៧៤បន្ទប់សម្រាប់ពលរដ្ឋ។ តែក្រុមហ៊ុនសាងសង់បាន៨អាគារប៉ុណ្ណោះ ដោយអះអាងថាខ្ស័យធន៕
No comments:
Post a Comment