Friday, May 25, 2012
ក្រុមអ្នកបញ្ជាទិញពិភាក្សាអំពីការផ្តល់អាហារដល់កម្មករ
ក្រុម អ្នកបញ្ជាទិញផលិតផលវាយនភណ្ឌកំពុងពិភាក្សាគ្នាជាមួយក្រុមថៅកែ ដើម្បីស្វែងរកលទ្ធភាពផ្តល់អាហារដល់កម្មករផ្ទាល់តែម្តង ដើម្បីបំប៉នសុខភាពកម្មករ កម្មការិនី។ ការផ្តួចផ្តើមថ្មីនេះ កើតឡើងបន្ទាប់ពីហេតុការណ៍នៃការដួលសន្លប់កម្មករយ៉ាងច្រើនកាលពី ឆ្នាំមុន។
មូលហេតុមួយនៃការដួលសន្លប់របស់កម្មករ និងកម្មការិនីត្រូវបានគេបន្ទោសទៅលើបញ្ហាសុខភាពរបស់កម្មករ។ កម្មករ កម្មការិនីដែលជាទូទៅមិនបានបរិភោគអាហារត្រឹមត្រូវដែលអាចទ្រទ្រង់ សុខភាពរបស់ពួកគេដើម្បីធ្វើការឡើយ។
លោកអាត់ ធនប្រធានសម្ព័ន្ធសហជីពស៊ីខៅឌូ បានថ្លែងនៅក្នុងពិធីជួបជុំជាមួយអ្នកសារព័ត៌មានកាលពីល្ងាច ថ្ងៃទី២៣ថា ក្រុមអ្នកបញ្ជាទិញ ដែលជាក្រុមហ៊ុនម៉ាកល្បីៗកំពុងពិភាក្សាជាមួយក្រុមថៅកែរោងចក្រដើម្បី សម្រេចអំពីលទ្ធភាពនៃការផ្តល់អាហារដល់កម្មករផ្ទាល់តែម្តង ចៀសវាងកម្មករស្វែងរកអាហារដែលខ្វះជីវជាតិបរិភោគខ្លួនឯង។ ការពិភាក្សារបស់ក្នុងអ្នកបញ្ជាទិញដែល បើតាមលោកអាត់ ធនដឹង គឺត្រូវបានរៀបចំធ្វើនៅក្នុងទីក្រុងហុងកុងម្តងហើយ ហើយការពិភាក្សាបន្តនឹងអាចធ្វើនៅក្នុងរាជធានីភ្នំពេញនេះនៅពេល ខាងមុខ។
«ជាទូទៅ កម្មករ កម្មការិនីគាត់តែងបរិភោគអាហារដែលមានតម្លៃថោក ខ្វះជីវជាតិ ដើម្បីគាត់អាចសល់ប្រាក់។ ដូច្នេះ ពួកគាត់អត់មានកំលាំង ឬសុខភាពល្អដើម្បីធ្វើការងារនោះទេ។ សុខភាពខ្សោយនេះ ជាមូលហេតុមួយដែលធ្វើអោយកម្មករដួលសន្លប់» នេះជាការអះអាងរបស់លោកអាត់ ធន។
បើតាមលោកអាត់ ធន កាលពីឆ្នាំ២០១១កន្លងទៅ មានកម្មករ កម្មការិនីជិត២០០០នាក់បានដួលសន្លប់ ហើយនៅដើមឆ្នាំ២០១២នេះ ក៏មានកម្មករ៦០០នាក់ដួលសន្លប់រួចហើយដែរ។
អាហារគឺជាបញ្ហាធំមួយរបស់កម្មករដែលត្រូវដោះស្រាយ។ ក្នុងឱកាសនៃទិវាការងារអន្តរជាតិឆ្នាំនេះ អង្គការពលកម្មអន្តរជាតិ ILO បានធ្វើយុទ្ធនាការតាមរយៈការសម្តែងសិល្បៈអប់រំអោយកម្មករ កម្មការិនីគិតគូរអំពីការបរិភោគអាហារដែលមានគុណភាព៕
Subscribe to:
Post Comments (Atom)
No comments:
Post a Comment