ដោយ ដែន អយុធ្យា
2012-05-03
ពលរដ្ឋធ្វើដំណើរឆ្លងកាត់សាឡាងនៃកំពង់ចម្លងអ្នកលឿង បានចោទបុគ្គលិកកំពង់ចម្លងនេះថា បានប្រព្រឹត្តអំពើពុករលួយ ដោយទារលុយថ្លៃសំបុត្រឆ្លងសាឡាងលើសចំនួនកំណត់។
ទិដ្ឋភាពរថយន្តកកស្ទះនៅកំពង់ចំលងអ្នកលឿងត្រើយខាងកើត រូបថតថ្ងៃទី២៥ ខែមេសា ឆ្នាំ២០១២។
ក្រុមប្រជាពលរដ្ឋជាអ្នកបើករថយន្តឆ្លងកាត់កំពង់ចំលងអ្នកលឿង ឬសាឡាងអ្នកលឿង បានឲ្យដឹងប្រហាក់ប្រហែលគ្នាថា អំពើពុករលួយកំពុងកើតមាននៅកំពង់ចំលងអ្នកលឿង។
ភាពអនាធិបតេយ្យទាំងនោះ មានដូចជាបុគ្គលិកកំពង់ចំលងនោះបានគាបយកលុយថ្លៃឆ្លងសាឡាងលើសតម្លៃក្នុងវិក្កយបត្រ និងភាពមិនប្រក្រតីមួយចំនួនទៀត។
អ្នកបើករថយន្តទេសចរណ៍ឈ្មោះ ជួន សារិន ស្ថិតក្នុងចំណោមពលរដ្ឋផ្សេងទៀត បានស្នើទៅស្ថាប័នពាក់ព័ន្ធឲ្យមានវិធានការទប់ស្កាត់ ឬលុបបំបាត់អំពើពុករលួយយកលុយលើស ដែលកំពុងកើតមានក្នុងអង្គភាពកំពង់ចំលងអ្នកលឿងឲ្យបានជាស្ថាពរ។
លោកថា សំរាប់រថយន្តទេសចរណ៍ដឹកភ្ញៀវ ១២កៅអី ក្នុងវិក្កយបត្រតម្រូវឲ្យបង់លុយចំនួន ៨.៥០០រៀល ១គ្រឿង ប៉ុន្តែបុគ្គលិកកំពង់ចំលងបានគាបយកលុយរហូតដល់ ៩ពាន់ ទៅ ១ម៉ឺនរៀល បើមិនបង់ឲ្យគេ គេនឹងទុកឲ្យរថយន្តខកជើងសាឡាងក៏មាន។
អ្នកធ្វើដំណើរផ្សេងទៀតក៏បានរអ៊ូរទាំថា មិនគួររដ្ឋាភិបាលទុកឲ្យអំពើពុករលួយកើតមានអនាធិបតេយ្យក្នុងស្ថាប័នរដ្ឋមិនបានទប់ស្កាត់ដូច្នេះទេ។ លោកថា បុគ្គលិកកំពង់ចំលងអ្នកលឿងកំពុងបង្កភាពក្តៅក្រហាយដល់អ្នកបើកបររថយន្តជារៀងរាល់ថ្ងៃ ប៉ុន្តែមិនទាន់ឃើញស្ថាប័នពាក់ព័ន្ធផ្នែកណាមួយជួយទប់ស្កាត់នោះទេ។
លោក សួន ប៊ុនទ្រី ក៏ជាអ្នកបើករថយន្តឆ្លងកាត់កំពង់ចំលងសាឡាងអ្នកលឿងម្នាក់ដែរ ក្នុងចំណោមអ្នកដំណើរជាច្រើនទៀត បានឲ្យដឹងថា អំពើពុករលួយគាបយកលុយពីម្ចាស់រថយន្តពិតជាកំពុងកើតមាន ក្នុងស្ថាប័នកំពង់ចំលងអ្នកលឿងពិតមែន។
លោក សេង ឈួន ប្រតិភូរាជរដ្ឋាភិបាលទទួលបន្ទុកប្រធានកំពង់ចំលងអ្នកលឿង បានបដិសេធមិនផ្តល់អត្ថាធិប្បាយទេ ជុំវិញការចោទប្រកាន់លើករណីអំពើពុករលួយ ដែលកើតមានក្នុងស្ថាប័នលោក តាមទូរស័ព្ទ នៅថ្ងៃទី៣ ខែឧសភា។
ទោះយ៉ាងណា លោក មាស ខេង ជាសមាជិកក្រុមប្រឹក្សាខេត្តស្វាយរៀង។ លោកបានបញ្ជាក់ថា រដ្ឋាភិបាល ឬស្ថាប័នពាក់ព័ន្ធមិនគួរទុកឲ្យអំពើពុករលួយបន្តកើតមាននៅកំពង់ចំលងអ្នកលឿង បង្កផលវិបាកដល់អ្នកធ្វើដំណើរនោះទេ។
លោកបន្តថា អំពើពុករលួយក្នុងកំពង់ចំលងអ្នកលឿង មិនមែនទើបកើតមានថ្មីៗនេះទេ គឺបានកើតមានយូរឆ្នាំមកហើយ និងស្ទើរក្លាយជាទម្លាប់ទៅហើយ ប៉ុន្តែមិនទាន់ឃើញអាជ្ញាធរទប់ស្កាត់ទេ។
ទាក់ទងកំពង់ចំលងអ្នកលឿងនេះដែរ មិនមានប្រភពបញ្ជាក់ថា ក្នុង ១ថ្ងៃៗកំពង់ចំលងអ្នកលឿងនេះ មានរថយន្ត និងអ្នកធ្វើដំណើរឆ្លងកាត់មានចំនួនប៉ុន្មាន និងទទួលបានចំណូលប៉ុន្មាននោះទេ។
ទោះយ៉ាងណា ប្រជាពលរដ្ឋបានថ្លែងថា ពួកគាត់ពុំមានជំនឿថា រដ្ឋាភិបាលកម្ពុជា អាចលុបបំបាត់អំពើពុករលួយក្នុងស្ថាប័នរដ្ឋាភិបាលបានទេ សូម្បីអំពើពុករលួយកំពុងកើតមានក្នុងស្ថាប័នកំពង់ចំលងអ្នកលឿង រដ្ឋាភិបាលមិនបានដឹង និងមិនទាន់អាចទប់ស្កាត់បានផងនោះ៕
No comments:
Post a Comment