ដោយ កាន់ វិច្ឆិកា និង អ៊ឹង ប៊ុនថន ថ្ងៃច័ន្ទ ទី07 ឧសភា ឆ្នាំ2012 ម៉ោង15:34
លោកនាយករដ្ឋមន្ត្រី ហ៊ុន សែន (រូបថត មុនីរតន៍)
រដ្ឋាភិបាលកម្ពុជាប្រកាសផ្អាកជាបណ្តោះអាសន្ន ចំពោះការផ្តល់សម្បទានដីសេដ្ឋកិច្ចទៅឲ្យក្រុមហ៊ុននានា និងព្រមានដកហូតយកដីសម្បទាន ពីក្រុមហ៊ុនណាដែលកាប់បំផ្លាញព្រៃឈើ ឬមិនគោរពច្បាប់។
បទបញ្ជារបស់លោកនាយករដ្ឋមន្រ្តី ហ៊ុន សែន យ៉ាងដូច្នេះ នៅថ្ងៃច័ន្ទនេះ គឺធ្វើឡើងស្របពេលអ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំ លោក សុរិយា ប្រាសាទ ស៊ូប៊ែឌី កំពុងចុះពិនិត្យផ្ទាល់ពីបញ្ហារំលោភសិទ្ធិមនុស្សធ្ងន់ធ្ងរ ដោយសារការផ្តល់ដីសម្បទានសេដ្ឋកិច្ចនេះ។
ស្តាប់សម្លេង៖
យោងតាមបទបញ្ជា ស្តីពី វិធានការពង្រឹង និងបង្កើនប្រសិទ្ធិភាពនៃការគ្រប់គ្រងសម្បទានដីសេដ្ឋកិច្ច ដែលចេញចុះហត្ថលេខាដោយលោកនាយករដ្ឋមន្រ្តី ហ៊ុន សែន នៅថ្ងៃទី០៧ ខែឧសភា ឆ្នាំ២០១២នេះ បានដាក់បទបញ្ជាចំនួន៤ចំណុច ដោយ ទី១ ប្រកាសពីការផ្អាកជាបណ្តោះអាសន្ននូវការផ្តល់សម្បទានដីសេដ្ឋកិច្ច។ ទី២ ឲ្យក្រសួង ស្ថាប័ន និងអាជ្ញាធរដែលមានសមត្ថកិច្ចពាក់ព័ន្ធ ត្រូវអនុវត្តន៍ឲ្យមានប្រសិទ្ធិភាពខ្ពស់ នូវគោលនយោបាយ និងរាល់លក្ខខណ្ឌទាំងឡាយនៃសេចក្តីសម្រេចរបស់រដ្ឋាភិបាល និងការផ្តោតការយកចិត្តទុកដាក់លើការអនុវត្តន៍កិច្ចសន្យា ស្តីពីការផ្តល់សម្បទានដីសេដ្ឋកិច្ច។ ទី៣ ព្រមានដកហូតយកដីពីក្រុមហ៊ុនទាំងឡាយណា ដែលមិនអនុវត្តតាមនីតិវិធីច្បាប់ជាធរមាន និងតាមកិច្ចសន្យា ដោយកាប់ឈើលក់ហើយមិនធ្វើការអភិវឌ្ឍន៍ដីសម្បទាន ឬទន្ទ្រានដីបន្ថែម និងបំពានដីរបស់ប្រជាពលរដ្ឋ ឬដីសហគមន៍។ និងទី៤ ចំពោះសម្បទានដីសេដ្ឋកិច្ចដែលបានទទួលការអនុញ្ញាតជាគោលការណ៍ពី រដ្ឋាភិបាលរួចហើយ មុនថ្ងៃចេញបទបញ្ជានេះ ត្រូវបន្តអនុវត្តឲ្យបានម៉ឺងម៉ាត់ និងមានប្រសិទ្ធិភាពខ្ពស់បំផុត។
ប្រធានផ្នែកស៊ើបអង្កេតនៃសមាគមអាដហុក លោក នី ចរិយា បានស្វាគមន៍ចំពោះវិធានការថ្មីនេះ។ ប៉ុន្តែលោកសុំឲ្យពិនិត្យឡើងវិញ នូវដីសម្បទានដែលផ្តល់ឲ្យកន្លងមក ៖ "ការផ្អាកហ្នឹងវាជាការត្រឹមត្រូវមួយហើយ ប៉ុន្តែមិនត្រឹមធ្វើ ត្រឹមតែផាកទេ សុំអោយពិនិត្យឡើងវិញ ទៅលើសម្បទានដែលបានផ្តល់អោយ ក្រុមហ៊ុនហ្នឹងអនុវត្តន៍មិនត្រឹមត្រូវតាមច្បាប់ទេ ត្រូវតែដកមកវិញទៅ”។
អ្នកនាំពាក្យគណបក្សសមរង្ស៊ី លោក យឹម សុវណ្ណ មានប្រសាសន៍ថា ការផ្អាកជាបណ្តោះអាសន្ននូវការផ្តល់ដីសម្បទានសេដ្ឋកិច្ចនេះ ហាក់ដូចជាយឺតពេល និងថា វិធានការនេះ គឺជាការកេងចំណេញនយោបាយជិតបោះឆ្នោត ៖ "អ្វីដែលធ្វើហ្នឹង ហាក់បីដូចជាចង់យឺតពេលបន្តិចហើយ ដោយសារតែព្រៃឈើមួយចំនួនត្រូវខ្ទេចខ្ទី ដីធ្លីស្រែចំការប្រជាពលរដ្ឋត្រូវបាត់បង់ នេះជារឿងមួយគួរអោយសោកស្តាយបំផុត ហើយទើបតែមកធ្វើនៅពេលប៉ុន្មានថ្ងៃ មុនថ្ងៃបោះឆ្នោត សូមកុំអោយទង្វើនេះ គ្រាន់តែជាទង្វើប្រជាពិធុថដើម្បីបោកប្រាស់ប្រជាពលរដ្ឋ”។
សំឡេងប្រជាធិបតេយ្យ VOD មិនអាចសុំការបំភ្លឺបន្ថែម ពីអ្នកនាំពាក្យរដ្ឋាភិបាលទេ នៅថ្ងៃច័ន្ទនេះ។
យោងតាមរបាយការណ៍សិទ្ធិដីធ្លី និងលំនៅដ្ឋាន ឆ្នាំ២០១១ របស់សមាគមអាដហុក បានបង្ហាញថា រាជរដ្ឋាភិបាល បានផ្តល់ដីចំនួន ៧៥១.៨៨២ ហិកតា ទៅឲ្យក្រុមហ៊ុនឯកជនវិនិយោគ។ ប៉ុន្តែរបាយការណ៍នេះ បានរកឃើញថា ក្នុងឆ្នាំ២០១១ មានពលរដ្ឋយ៉ាងតិច ៤២៧នាក់ រងការចោទប្រកាន់ ៩៥នាក់ត្រូវចាប់ខ្លួន និង៤៨នាក់ទៀត ជាប់ឃុំដោយសារជម្លោះដីធ្លីជាមួយក្រុមហ៊ុន ដែលទទួលបានដីសម្បទានសេដ្ឋកិច្ចនេះ។ អាដហុក ក៏បានបញ្ជាក់ទៀតថា នៅឆ្នាំ២០១១ កន្លងមក មានប្រជាជនចំនួន ១២៧ សហគមន៍ ត្រូវបានបណ្តេញចេញនៅទូទាំងប្រទេស ក្នុងនោះមាន ៨១សហគមន៍នៅក្នុងរាជធានីភ្នំពេញ។ បញ្ហាទាំងនោះ អាដហុក រកឃើញថា ដោយសារការផ្តល់ដីសម្បទានខ្លះ រំលោភលើច្បាប់ភូមិបាល៕
No comments:
Post a Comment